كل ما آجى أقف أقع

كل ما تستقر نفس الواحد تلاقى حاجة جايه تنكد عليه عيشته .. يا ترى هيا الدنيا كدا ولا الواحد نحس ؟ ليه فى ناس عايشه حياتها عادى وانا اللى كدا ؟؟ انت مش كدا ... فى ناس كتير غيرك كدا ... ايه هوا كدا ده بقى ؟ كدا ده هو المشاكل والطوبه اللى بتوقف طريقك فى كل حاجة بتبقى عايز تعملها ... كل الناس عندها مشاكل و يمكن اكبر من بتاعتك و اصعب ... فى مشاكل بتعطل حياة بنى آدمين .. مبقولش ان مشكلتك سهله و انك تافه لأ بس بقولك متدخلش نفسك فى موود الكآبه اووى .. بص لغيرك هتلاقى عنده مشكله اكبر هتتكسف تزعل على مشكلتك ... بص لواحد معندوش بيت ينام فيه فى الشتا ... بص لواحد مش لاقى ياكل ... بص لأم فقدت ابنها ... المشاكل كتير مفيش بيت او حد معندوش مشاكل بس الناس بقى هى اللى بتختلف....فى ناس بتعدى المشكله و تحلها ببساطه و ناس تعقدها ... فى ناس بتبص للحاجة بنظره تانيه و هى ليه المشكله حصلت او ايه نتيجتها او اسببها .. الناس بتختلف و المشاكل كمان بتختلف .. المهم اللى عايزاك تعرفه انك مش لوحدك اللى عندك مشاكل ... خدها ببساطه هتعدى =)

اسمع كلامك

بطل تسمع كلام الناس ... متخليش كلامهم يمشى حياتك متستناش حد يقولك رسمك حلو عشان ترسم .. او انك ذكى عشان تؤمن انك ممكن تبقى انسان ناجح ... محدش فهمك اكتر منك .. متستناش حد يشوف انت تقدر تعمل ايه و يقولك عشان تعمله .. جرب انت تعمل كل حاجه و تكتشف نفسك .. لما يبقى الايمان بقدراتك من جواك مش من كلام الناس بيبقى اقوى بكتير و بيساعدك حتى لو فشلت ..

كبرت أنا و هذا الطفل لم يكبر

ما زال بداخلى قلب طفل يعشق الحرية دون قيود ... ما زلت أخاف النوم فى الظلام ...مازلت أكره المدرسه و أول يوم دراسى فى السنه ..... مازلت أخاف يوم الامتحان ... ما زال بداخلى طفل لم يكبر ... طفل يظن أن نوايا البشر مازلت نقيه.. وأن الناس تحب بعضها بدون أسباب وراء الحب .. وأن الله يغفر لنا جميع ذنوبنا فقط عندما نصلى ... مازال بداخلى طفل يرفض عالم تلوث بصفات عكس طبيعة البشريه و عكس ما خلقنا الله سبحانه و تعالى عليه ... لقد خلقنا فى أحسن صورة .. مازلت أرى أن سيأتى يوم و يفهمنى من حولى ... متفائله بأن غداً سيكون أفضل من اليوم .... مازالت الشوكولاته بالنسبالى تغير مزاجى و مازالت أعشق الهابى ميل و لعبتها الصغيرة (مش بتشبعنى أكيد بس بحبها ) ...مازلت أكون أسمى فى حبات الشوربة بالحروف...لسه بختفى لما بعمل مصيبه :D

أنا و دماغىى

رنا : قومى ذاكرى
أنا : حاضر قايمه هشوف بس آخر حاجة على تويتر و هقوم
رنا: خلاص شوفتى ؟
أنا: يا بنتى اسكتى شوية قلبتى على ماما ع الصبح كدا ليه اصبرى
رنا: طب يلا نوصايه كدا و هتقومى (12:00
أنا: طيب نوصاية سبينى بقى اقعد بمزاج عشان ابقى بذاكر بنفس
رنا : (الساعه 12:45) على فكره انتى بتستهبلى
أنا : طيب خلاص اول ما تيجى واحده هقوم مفرقتش الربع ساعه دى
رنا: والله انتى مش باينلك مذاكره .. اتفضلى اخلصى
أنا: (الساعه 1:00) انا قايمه بقى خلاص :D
رنا : يا بنتى انتى مش بصه فى الكتاب ركزى
أنا : مهو انتى لو تبطلى هرى معايا هركز
رنا : انتى عارفه انا بفكر فى ايه
أنا: فى ايه ياختى قولى
رنا: فى حالك ده
أنا: بقولك ايه حالى عاجبنى سبينى فى حالى انا مش عايزه افكر كفايه ال أنا فيه
رنا : يا بنتى فكرى بس معايا
أنا : هو مش انتى اللى كنتى عماله تزنى من شويه عشان اقوم اذاكر
رنا : طيب هسيبك تذاكرى قال يعنى هتفلحى
أنا: ..........................و بعدين
رنا: انا سبتك تذاكرى أهو عشان تعرفى انك أصلا مشغوله بنفس الموضوع
أنا: طب كفايه زن وحياة أبوكى أنا مش عايزه أفكر
رنا: شوفتى بيعملوا معاكى ايه ؟
أنا : هما مين ؟؟
رنا: ما انتى عرفاهم احنا هنستعبط
أنا: أنتى عارفه احسن حاجة ليكى إنى أنام عشان انتى مش هتبطلى رغى سلااااااااااام
رنا : خليكى كدا تفضلى تهربى منى و من مشاكلك بالنوم
................................................................................................................................
بنام و أصحى و رنا لسه صاحيه مش بتنام ... أنا زهت من دماغى

إتفقنا على ألا نتفق

المجتمع يعنى مكان او حاجة بيجتمع عليها الناس ... إلا إحنا (مجتمع لا يجتمع) ... دايما مبينا حاجة بتفرقنا مقولتش إننا لازم آرائنا كلنا تبقى زى بعض لا طبعا إختلاف وجهات النظر و الآراء ده شئ طبيعى ... الفكرة فى القضية ... مبنجتمعش على قضية واحده حتى نختلف فيها ... ممكن تلاقى مظاهرة فى التحرير عشان حق الشهدا و تبص تلاقى الأطباء عاملين إعتصام عشان مرتباتهم طب بذمتكوا إللى يشوف المنظر ده هيقول إيه "ده وقته؟" كل واحد بيدور على مصلحته و نسيننا إننا مجتمع واحد ... الفكرة فى توحيد القضية .....لو حد جرب يفتح فى المعجم معنى "مجتمع" هيلاقى ..المجتمع العربى : (هو جماعه من الناس تعيش سوياً و تربطهم روابط مشتركه
يعنى انا مجبتش حاجة من عندى أهو !!
كل واحد بيبصلها من عينيه مجربش يبص من عين اللى جنبه متتريقش والله انت ممكن تبص من عين اللى جنبك .. ما انت لو بتحب حد بتقعد تدور هو بيحب ايه و تعمله بتبص بعينه مش بعنيك ...
جرب تخرج برا نفسك شوية و تبطل انانيه ....
كل شهيد مات بالنسبالك لما بتفتكره وسط يومك اللى مليان و الوقت اللى بيجرى و زحمة الحياة لو افتكرته بتقول الله يرحمه ... جربت تفكر امه عامله ازاى دلوقتى .. الوقت مش بيعدى بالنسبالها .. الدنيا اسودت فى عنيها .. حته منها ماتت ... كفايه عليك حياتك يا راجل انت هتعمل ايه ولا ايه ؟ بعت القضيه !
جيكا طالب ثانويه عامه اللى مات عشان بيجيب حق صاحبه ... فكرت انت تجيب حقه .. ولا بتقول ايه اللى نزله اصلا؟؟ ده واد فاضى ... والله ما حد فاضى غيرك ...انت شخص فاضى من جوه
زى برضو ما قلنا ايه اللى نزل البنت اللى اتعرت التحرير ... هنفضل نرمى اللوم على الضحيه لحد امتى ... هيفضل لحد امتى المجتمع يحاسب الضحيه؟

إجرى يا مجدىىىىىىىىىىىىىىىىىىىى

ده بقى موقف عمرى ما هنساه كنا مشيين بالعربيه و فجأه شوفنا ولد نعرفه واقف مع بنات بغض النظر عن اسم الولد اللى لو افتردنا ان اسمه مجدى ..طب بتجرى ليه يا مجدى لما انت عامل فيها راجل اووى و واقف مع بنات .. طب يا ترى مجدى شايف اللى بيعمله ده صح ؟؟ طب ما لو صح بتجرى ليه يا مجدى ؟؟ :D
مجدى احب اقولك شكلك بقى وحش xD
طب تفتكروا مجدى ممكن يسيب اخته تقف مع ولاد ... لو آه يبقى مجدى راجل اووى و محتاج يشرب بريل .. و لو لأ فا مجدى يبقى بيستهبل لما انت يا مجدى مترضهوش على اختك ترضاه على بنات الناس ليه ؟؟ و مش عايزه بقى اسمع كلمة انا ولد محدش هيقول عليا حاجة ..لا يا مجدى انت فاهم غلط .. الولد ليه سمعه زى البنت و بغض النظر عن السمعه ف الولد هيتحاسب زى البنت يوم القيامه ربنا مش هيقولك آه انت حلال تصاحب عشان انت ولد .. افكار المجتمع الرجعيه و المتخلفه ربنا مش مسؤل عنها ... و ربنا عمره ما هيرزقك بزوجه كانت مبصاحبش لأ هيرزقك بواحده زيك و لو فرضنا انه رزقك بواحده مبتصاحبش فيطلعلك بنت تصاحب و تستغفلك او ولد صايع يضيع تعبك فى تربيته ده لو عرفت تربيه .. إذا كنت معرفتش تربى نفسك هتربى ابنك ... طب هتقولوا ايه ؟ ... "دان تدان و لو بعد حين" ... يوم القيامة مش هتعرف تجرى يا مجدى :)

أمى دكتورة بالفطرة

أمى مش دكتورة ..هى مدرسة ..لكن اول ما حد فينا بيجيله برد أو يعييا بتبقى دكتورة .. بتجيب الدواء اللى على مزاجها اصلها اتعودت بقالها 18 سنة بتجرب فيا الادويه ... بس الغريب بقى اننا بنخف .. سبحان الله ... انت مش بتخف عشان هيا ادتك الدوا الصح او عشان هيا عارفة فعلا الدوا.... انت بتخف بدوعاها ليك و خوفها عليك .. و كل أمهاتنا عندها اعتقاد ان الدكاترة فى بلدنا بهايم (مع الاعتذار للدكاترة ) و متسألنيش اومال ليه عايزانى ابقى دكتورة ؟ ... و هو كورس واحد بناخده لما اى حد يبقى عيان .. كونجستال او اوجمنتين ... و بسيلفون لو بيكح و ابيمول لو سخن :D
انا حفظت :))))))))) 

مدرسة لم ينجح أحد

المدرسة دى ماشية بنفس نظام الدولة ... يا حبيبى قول اللى انت عايزه و إحنا هنعمل اللى احنا عايزينه (الديمقراطية فى بلدنا) ...أى مشكلة بتحصل بيدوروا على ثغرة عشان يطلعوا اللى قدامهم غلطان ... اومال لو مش بفلوسنا يا ولاد ال.... الناس الطيبين !! مشكله مثلا زى بتاعت انهارده دى .. مدرس عربى محترم إلا ربع حاطت امتحان عايز الحرق غير مطابق لمواصفات امتحان طبيعى بذمة اهلك عمرك سمعت عن حاجة اسمها حولى من اسلوب إنشائى لخبرى ..الراجل بيألف الاسئلة ... المهم إن ده مش مدرس فصلى ده مدرس الفصل التانى و قبل الامتحان بما إنه إنسان محترم إدى الحاجات اللى جت فى الامتحان لفصله و قال محدش يصور الكراسه لحد ولا يقول ع الحاجات دى ... (عنده ضمير).. المهم انا مليش دعوه بيه انا ليا بإمتحانى خدت الامتحان اللى بعد ما اتصحح أعلى درجه فى الفصل 20/30 يعنى الراجل اصلا مش عارف يحله ولا يحطله نموذج إجابه ... روحت لمشرفة الدور و بتناقش معاها الست تقولى الحاجات دى من المنهج إنتوا اللى مبتذاكروش ... (ينيلك).. أخدت الورقة و رحت لمدرس فصلى ..والله الراجل مش عارف يفتح بوقه و يقولى ع الإجابه الصح .. و مدرس بقى تانى ابن حلال كدا بيسخن الدنيا قالى انتى لو خدتى الورقة دى و روحتى للإدارة الامتحان ده هيتلغى .. روحت تانى لمشرفة الدور و بقولها انا هروح الإدارة و اشتكى الإمتحان ده و المدرس اللى حطه... الإمتحان ده يتعاد .. ابص الاقى الست فتحت شرشحه (روحى يا جببتى احنا مبنتهدتش ..إحنا مدرسة خاصه و بنرفع من مستوى طلبتنا).... اسكتلها ...لأ طبعا .. قلتلها مدرسة خاصة بس ليكوا إدارة .. تجيبوا إمتحان صعب ماشى لكن ده إمتحان يجيب تخلف ... قالتلى بكرا نتكلم و نبقى نشوف الموضوع ده .. طبعا بتتوهنى مهوا ده نظامهم القذر ... دخلت الفصل كتبت ورقة و قلت نمضى عليها كلنا و نروح بيها الإدارة و كالعاده مفيش إجماع على رأى إللى عايزاه الامتحان يتعاد و إللى عايزاه يتلغى بس متمتحنش تانى .. و هو ده حال بلدنا بيضيع حقنا بسبب إختلاف رأينا ...رغم إن كلنا بندافع عن قضية واحدة لكن مش عارفين نجتمع على فكرة واحده ... المهم إنى مش هسيب الموقف ده يعدى يعيدوا الإمتحان ... يتبع

الصابون خلص

تلك هى لحظة من لحظات قمة سعادتى لما الاقى صابون المواعين خلصان ياااااااااااااااااااااه ع السعاده إللى ببقى فيها ... المهم إنهم جابوا غسالة اطباق بس مش كل حاجة بتتحط فيها ... و بعدين بقى الغساله دى قرف اكتر ... اقعد ساعة انضف الاطباق من بقايا الاكل و بعدين ارصهم فى الغساله و احط المسحوق واشغلها موااااااااااال ... لو كنت غسلتهم انا كنت ريحت نفسى ... و يحلى بقى الاكل و الشرب وتنضيف التلاجة بحس امى بتستغل الفرصة وانا واقفة بغسلهم...... كل ما اقول خلاص قربوا يخلصوا الاقى حد لطيفففففففففففففففففف بيحط حاجة تانى فى الحوض ... و من هنا ببدأ فى تسميعهم الموشح المعتاد بعد كل مرة بغسل فيها المواعين : " اللى ياكل ولا يشرب فى حاجة يغسلها انا غسلتهم اهو اياك الاقى حاجة تانى فى الحوض مهو لو كل واحد بيغسل طبقه ما كنتش وقفت كل ده اغسل قرفكوا .... عشان انتوا بنيآدمين مهمله عايزين حد يخدم عليكوا هاتولكوا شغاله بقى " ترد ماما قائله :" عملتى ايه يعنى عشان عمللنا الفيلم ده كله دول هما طبقين ".....ساعة واقفة وتقولى طبقين بحس ساعتها بشلل اطفال رباعى اصابنى

اسئله غير منطقيه -.-' !

امى لما تبقى عايزه حاجة تنده عليا و بعدين تسألنى ...رنا بتعملى ايه ؟؟...مبعملش حاجة يا ماما .. طب تعالى اعمليلى شاى ..طب ما تقولى يا حجة من الاول عايزه شاى ..عارف هيا مش بتسأل عشان تشوفنى مشغوله او لأ... فا لو مشغوله تسبنى لأأأأأأأ خالص ابسلوتلى ..لو قلتلها بذاكر تقولى طب خدى
Break و تعالى اعمليلى شاى
تصحى الصبح ...رنا خلصتى لبس ؟؟ لأ يا ماما لسه... طب معلش تعالى اعمليلى قهوه عشان مش قادره افتح عينى ... ايه علاقة بقى سؤال خلصتى لبس بالحوار ؟
لما تبقى عايزانى اقف معاها فى المطبخ بس مش عايزه تطلب منى ... تقف فى المطبخ و تسمعنى الاسطوانه بتاعت انا محدش حاسس بيا ... وانا مش الشغاله اللى اشترتوها و انتوا معندكوش دم ... تنتهى الاسطوانه لو قمت و قفت معاها ... كان هيحصل ايه لو قالتلى تعالى ساعدينى لكن لأأأأأأ انا امى تختلف عن كل الامهات بتتبع طريقة أنب ضميرهم .. يخلوا عندهم دم ...

على جنب يا اسطى ونزلنى

كوكب الارض بقى ممل اووى ..حد يوقف انا عايزه انزل ...الشوارع بقت ممله والناس بتكلم بلغه غريبة .. ..يمكن الكائنات الاخرى تبقى افضل ... اهو الواحد يجرب يعيش من غير جاذبية ارضية ...يبطل يلزق فى الارض و هو ماشى ..نجرب نبقى بعيد عن الناس بدل التلزيق ده ..الواحد حاسس انه فى ميكروباص ... ما توسعوا يا اخونا شوية ...كل واحد حاشر منخيره فى حياة اللى جنبه ..عاملين زى الراجل الرخم اللى حبكت يقرا الجرنال وهو فى ايدك فى الميكروباص و تبص تلاقيه لازق وشه وفى الصفحه .... (من تدخل فيما لا يعنيه سمع ما لا يرضيه)...

على غير موعد

قالت : ماذا أخذت من الحب....؟ 

قلت: جراحا كثيرة .. ورصيدا من الاحلام اقل مما تتصورين .. لقد اخذ منى الحب سنوات طويله ... و لم يترك فى القلب شيئا غير

 ظلال من الحزن تراودنى من حين إلى حين 

قالت:  و هل يعيش الانسان بغير حب ...؟

قلت: إذا احببنا تألمنا و إذا عشنا بدون الحب تصبح الحياة بلا لون ولا طعم ولا رائحه 

الحب حركة...و الحياة بدون الحب هى السكون ...وانا افضل الحركه على السكون حتى لو كان الألم فيها 

قالت: ولكن الناس لا تؤمن الآن بالحب...لقد تغير شكله و لونه ... اصبح شيئاً غريبا علينا لم يعد ذلك الاحساس الصادق

قلت : لم افقد إيمانى بأن الحب موجود رغم كل المتغيرات التى طرأت على حياة الانسان 

قالت: أمازلت تشعر برغبة فى الحب؟

قلت: فى بعض الاحيان تصبح المشكلة فى داخلنا و ليست فى خارجنا ... ليس المهم ان نجد من يحبنا ...ولكن المهم ان تشدنا مشاعرنا إليه ...المشكلة ليست فى الطرف الآخر ولكنها فى داخلنا ...قد تجد من تحبه ولا يحبك....و قد تجد من يحبك ولا تحبه ....فالتوقيت قضيه مهمه فى الحب ...قد يأتى حينما نذهب ...و قد نذهب حينما يجئ .... إنه مثل حركة القطارات , المهم ان يلتقى المسافران فى وقت واحد ... و على محطة واحده ...فقد يهبط أحدهما فى لحظة يغادر فيها الاخر و قد يلتقيان على غير موعد ... وقد لا يلتقيان ابداَ..

هذا هو الحب ...مصادفة تأتى بدون ترتيب وعلى غير موعد ....ثم ترحل ايضا بدون انذار ...و على غير موعد 

 فاروق جويده  

بداخل كل إنسان تعرفه ... إنسان لا تعرفه

كثيراً ما كنت و مازلت اعتقد ان الدنيا اسهل بكثير من ان اظل احسب كل كلمة اقولها لكى لا يخطئ فهمى الناس ... الخطء ليس عندى فأنا احسن الظن بكلامهم فلماذا لا يحسنون الظن بى ؟ ... لأ ادرى ولكننى افضل اجتناب الناس على ان احسب كلامى ... ارى كم هى معقدة الدنيا فى أعين من يحسبونها ... لكى احسبها سأظل احاول دائماً البحث عن طريقة تفكير الآخرين لدرجة قد تجعلنى انسى طريقة تفكيرى ... لا افضل النظر للجانب المظلم من الامور ولأن لكل جانب مظلم هناك جانب مشرق ... لكن تأخذنا دراما الحياه لذلك المظلم و من هنا تبدأ المأساه عن من المخطئ فى حق الآخر .... ستظل نفوس البشر مثل الصناديق المغلقه التى لا يعرف مفتاحها غير الله سبحانه و تعالى ...

معلش ابقى اتغطى كويس

اظن محدش فينا مسمعش الجمله ديه من اهله لما يصحى يحكلهم حلم او كابوس و يكون فيه حته اكشن او خيال علمى :D
و بعدين ما ده طبيعى يعنى ده حلم ....بس هما لو يفتحوا دماغهم شويه و يبطلوا تريقة و يركزوا فى اللى بتحكيه هيلاقوا انه اللى عقلك الباطن مخزنه بيطلع فى الاحلام يعنى ممكن مثلا نطة احمد السقا اللى فى الحلم ديه تكون خنقه جواك ... الكلب إللى عضك تكون حاجة مضيقاك من واحد شتمته فى سرك او مش فى سرك و قلت عليه ده كلب  .. انا مش بفسر الاحلام ولا بفهم فيها بس الاحلام هيا مجرد رموز لحاجات متخزنه فى عقلك الباطن .. إللى نفسى افهمه سر إنى ليه ساعات لما بصحى بنسى الاحلام ؟ يمكن عشان حاجات مش متخزنه فى عقلى الباطن اوى او مش مهمه ...

بيحلى فى عينينا إللى مش فى إيدينا

كلنا مش بنحس بقيمة اللى فى ايدنا غير لما بيضيع ... او لما بنضحى عشان نحصل عليه ..لكن اللى بيجى سهل مش بيبقى ليه قيمه عندنا ..انا مثلاً عيد ميلادى كان  5/12و بعدين قعدت يومها استنى حد معين يتصل بيا .. و مفكرتش فى الناس اللى اتصلت واهتمت .. طب ليه دايما بنبص للى مش عندنا ...الرضا نعمه كبيرة ممكن تخليك اسعد انسان ولو اتحرمت منها مفيش حاجة هتريحك او تبسطك...

New Vision

The best 3 years of my life where i learned how to live , to dream , to think . How not to be like others , to be unique . Our Rules were how to do something that makes you happy without Breaking God's Rules. A place where time passes and u don't know how it passed quickly like that ..... i used to have a great family (No father or mother just sisters and brothers) . We did everything together ... we played ... talked... learned...trying together to help and courage each other .... we were different characters ..but we were like a puzzle that connected to complete the whole shape =) .. I lost a big part of my life ... but i will never loose the idea that i believe in it ... New Vision Made me ''BELIEVE'' ...I Miss You =(