وجهة نظر

                                 انا مش بفهم فى السياسة  بس كلامى مجرد وجهة نظر لواحدة عايشة فى بلد  وشايفة اللى بيحصل حوليا

انا مش إخوانية ولا علمانية ولا ليبراليه ولا يسارية و لا اشتراكية ولا كل الاسامى بتاعتكوا اللى انا مفهمش فيها حاجة ولا عايزة افهم 

انا مش عايزاك تصنفنى ولا تقولى انتى تفكيرك ده اسمه (......) انا عايزاك تفهم ان اى واحد بيقول اى حاجة هى مجرد وجهة نظر 

مشكلتنا اننا مش قادرين نفهم اننا لازم هنختلف ..      "وفى اختلافنا رحمة"..لازم نعرف انك هتسمع و هتحاول تشغل عقلك هتاخد من وجهة نظر اللى قدامك اللى يناسب مبادئك و تفكيرك و هتسيب اللى مش مناسب ليك .. بس انت كلامك مش نازل من السما اكيد فيه غلط فا لما حد يعارضك فكر فى اللى قاله يمكن يكون صح

...................

الفكرة العامة:  

وجهة نظرى بقى ان كل اللى احنا فيه ده بسبب اننا مش قادرين نتقبل خطأ بعض يعنى انا لو ضد الإخوان فى حاجات كتير بس الإخوان مظلومين فى نقطة مبقولش ان لأ الإخوان مظلومين هنا ... إن الإخوانى مش عايز يعترف بخطأ قياداته 

...........................

مع مين و ضد مين ؟  

انا ضد التحالف مع الجيش عشان الجيش قتل و سحل ايام محمد محمود بس احنا بننسى 

انا ضد الإخوان عشان واخدين الدين ستار لأفعالهم ومش من حق اى حد يتكلم بإسم الدين .. و الإسلام برئ من المنفرين

ضد الفلول اللى كانوا ضد الثورة فى 25 يناير و قالوا حسنى كان معيشنا فى امان 

ضد كل مين باع دم جيكا و الشيخ عماد وانس 

............................................. 

رأيى فى اللى بيحصل فى الفترة ديه ؟

الإخوان لا يصلحوا لحكم البلد بأى شكل من الاشكال مرسى كان شخصية ضعيفة جدااا سياسياُ و كان لازم يمشى 

بس الطريقة إللى مشى بيها مش صح اللى الجيش عمله ده تجاهل لنسبة كبيرة مؤيده 

 الجيش كان فى ايده بعد ال48 ساعة اللى اداهم لمرسى دول كان ممكن يقول انا هعمل انتخابات رئاسية مبكرة يدخل فيها مرسى واللى عايزه يكمل ينزل ينتخبه تانى او يقول انا هعمل استفتاء على بقائه كان فى حلول كتير غير اللى عمله

 تجاهل الشعب اللى فى الشارع اياً كان رأيه انا ضده

.................... 

المشكلة الاساسية ؟

المشكلة فينا عارفين احنا بقالنا سنة فى فساد بردو مفيش حاجة اتغيرت إعلام فاسد و الدنيا ماشية وسايط و كوسة 

الحل مش هيجى من سلطة و البلد مش هتنضف برئيس هتنضف بشعب 

حد فكر هو دوره ايه غير انه يعترض  على اى حاجة و يتأمر و يقول انا عايز ده و مش عايز ده ؟ انت بتعمل اللى عليك عشان تتطالب اللى قدامك انه يعمل اللى عليه ؟ انت عامل كل واجباتك و مخدتش كل حقوقك ؟

مثال لو عندنا اسرة من خمس افراد الأب فيها مش بيصلى بس الأم و ولادها كلهم بيصلوا هيتقال ده بيت بيصلوا فيه عشان الاغلبيه هى الصح , لو البلد كلها او الاغلبية مننا كويسين و الرئيس سيئ نبقى ساعتها نتكلم
"اتأمرون الناس بالبر و تنسون انفسكم و انتم تتلون الكتاب افلا تعقلون"

  احنا قعدنا سنة نسقف لباسم يوسف اللى كان قاعد ع الكرسى زى قلته و معملش حاجة للبلد اللى خايف عليها و كاره نظامها غير السخرية و جايبلنا واحد يتفشخر ببلدهم و يسخر من بلدنا حتى لو البلد ديه فيا كل حاجة وحشة بدل ما احاول احسن شكلها اخلينا نكته للعالم كله.... جون ستيوارت مذاكرش فى حواره عيب واحد فى بلدهم ... تركيا فيها اماكن زى عندنا فى مصر كلها زبالة و ناس مش عايشة عيشة آدمية بس بيطلعوا فى مسلسلاتهم اللى بنقعد نتفرج عليها بالساعات افضل ما عندهم احنا بنظهر اسوء ما فينا و مبنعملش حاجة عشان نغير اللى احنا فيه 

.. لكن واحد زى الدكتور مجدى يعقوب اللى سافر اثيوبيا عمل هناك عمليات مجانا لتوطيد العلاقات بينا و بين اثيوبيا ديه الناس اللى بتعمل اللى عليها واحد زى الدكتور عمرو خالد اللى عمل حملة محو الأمية عشان يساعد فى انتشار العلم ديه الناس اللى بتتحرك و تعمل حاجة للبلد ديه

عمرنا ما فكرنا نبدء إزاى ؟ احنا عمرنا ما هننهض بقاع المجتمع يعنى مش هتيجى لواحد كل اللى عايزة هدوم يلبسها و اكل و شرب و مكان يعيش فيه و تقوله عايزك مثقف و تقول رأيك و تعمل عشان البلد ديه تتقدم 

لكن ممكن نبدء بالطبقة المثقفة الجاهلة .. اللى بتقعد قدام الإعلام و تكرر كلامه .. الطبقة ديه اللى ممكن تسمع و تفهم و تغير معاك يعنى لو فهمت واحد و الواحد ده اشتغل و شغل اتنين تحتيه و الاتنين اللى تحتيه اشتغلوا و شغلوا اتنين تانيين تحتيهم تفضل تكبر الدايرة لحد ما نوصل لقاع المجتمع البايظ تماما ده يبقى انت كده اصلحت  60% من الشعب اللى هما الناس اللى دخلت مدارس و اتعلمت و بتعرف تقرا و تكتب ال60% دول لو 20% بس منهم اشتغلوا ع ال40% من بقيت الشعب الجاهل البلد ديه هتبقى مفهاش حد جاهل ولا حد مش فاهم ولاحد اداة يستخدمها كل مين ليه مصلحة شخصية بيطلع لمصلحته ع الشعب ولا كل مين بيستخدم جهلنا .

..................................

﴿إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ﴾